Бизиӊ театр» атамасындағы илимий-әмелий әнжуман өткерилди

Өзбекстан Республикасы Министрлер Кабинетиниӊ 2018-жыл 5-январдағы «2018-2022-жылларда мәмлекетлик театрлардыӊ материаллық-техникалық базасын беккемлеў ҳәм олардыӊ искерлигин раўажландырыў ис-илажлары ҳаққында»ғы 9-санлы қарарының 2-бөлим 13-бабында «Жас әўладты миллий идея, сабырлылық ҳәм мәртлик руўхында тәрбиялаўда үлкен әҳмийетке ийе болған белсенди заманласларымыздыӊ тымсалын жаратыў бойынша әмелге асырылып атырған реформалар ҳаққында мәмлекетлик театрлар ҳәр жылы «Бизиӊ театр» атамасындағы илимий-әмелий әнжуманды өткериў белгилеп қойылған болып, қарардыӊ орынланыўын тәмийнлеў, сондай-ақ, театр тарийхы, жыллар даўамында ерискен жетискенликлер ҳәм бүгинги күнде театрда алып барылып атырған дөретиўшилик жумыслар ҳаққында театр өнериниӊ ықласбентлерине таныстырыў мақсетинде Қарақалпақ мәмлекетлик жас тамашагөйлер театрында 11-декабрь күни «Бизиӊ театр» атамасындағы илимий-әмелий әнжуман болып өтти.

Әнжуманда дәслеп Өзбекстан ҳәм Қарақалпақстан халық артисти Р.Сапарова шығып сөйлеп, Қарақалпақ мәмлекетлик жас тамашагөйлер театрыныӊ жүзеге келиўи, өзи басшылық еткен дәўирдеги театрдыӊ дөретиўшилиги, театр хызметкерлериниӊ театрға болған пидәйылықлары ҳаққында айтып өтти. Сондай-ақ, жас тамашагөйлер театрыныӊ мәмлекетлик театрлар ишинде абырайы ҳәр тәреплеме жоқары екенлигинде баян етти. Әнжуман даўамында Қарақалпақстан халық жазыўшысы А.Султанов, Қарақалпақ мәмлекетлик қуўыршақ театрыныӊ бас режиссёры, «Дослық» ордениниӊ ийеси М.Бегимов, Өзбекстан мәмлекетлик көркем өнер ҳәм мәденият институты Нөкис филиалы аға оқытыўшысы, доцент Ж.Хожанов ҳәм ҳәм театрдыӊ Әдебий бөлим баслығы Д.Дарушовалар театрдыӊ раўажланыў басқышлары, бүгинги күндеги репертуары ҳәм жетискенликлери ҳаққындағы баянатлары менен қатнасты. 

Әнжуманныӊ әдебий бөлими жуўмақланғаннан соӊ тамашагөйлерге театр репертуарындағы спектакллерден үзиндилер көрсетилди ҳәм илимий-әмелий әнжуман театр актёр-актрисаларыныӊ атқарыўындағы концерт бағдарлама менен жуўмақланды.

ДарихаДарушова

Театрдыӊ Әдебийбөлимбаслығы