Мектебиме Китап саўға етемен

Китап таўсылмас билим дереги.  Бүгиниги  ҳәр тәреплеме раўажланған заманымызда  ҳәр қандай  мағлыўматты интернет сайтларынан кыйналмастан табыўымыз мүмкин. Сондай болсада инсан өмиринде китаптың орны айрықша. Биз китаптан алған билимлеримизди    өмиримиздиң ақырына шекем есимизде сақлап, керек ўақытта  пайдаланыўымыз мүмкин.

Ҳазирги күнде халқымыз арасында китапқумарлылық, китап оқыў мәденятын жәнеде арттырыў мәселесине мәмлекетлик көлемде дыкқат аўдарылмақда. Мәмлекетимиз басшысының  2017-жыл 12-январдағы  «Китап өнимлерин басып шығарыў  ҳәм тарқатыў системасын раўажландырыў, китап оқыў ҳәм китапқумарлықты арттырыў, оны үгит-нәсиятлаў бойынша комиссия дүзиў ҳақында»ғы бийлигиниң өзиде китапқумарларды оғада руўыхландырды.

Жасларымыздың информацияға,билим алыўға  болған талабын ата-бабаларымыздан мийрас қалған адамгершилик, инсанийлық пазийлетлерге терең байытылған  китаплар менен қандырсақ мақсетке муўапық болар еди. Себеби  жәмийетимизге қәўип салып турған ҳәр түрли  кери тәсирлерге  тек ғана терең билим ҳәм жоқары мәнәўиятымыз бенен қарсы гүресе алаўымыз мүмкин.

Бүгинги күнде мәмлекетимиз көлеми бойлап  «Оқыған мектебиме китап саўға етемен»  сүрени астында халқымызға белгили дөретиўши инсанлар менен ушырасыў кешелери шөлкемлестирилип атыр.

Усындай адебий кешелердиң бири Шымбай районындагы №6-санлы улыўма билим бериў мектебинде болып өтти.  Онда Қарақалпақ мәмлекетлик жас тамашагөйлер театры директоры  Қарақалпақстан Республикасына хызмет көрсеткен көркем-өнер ғайраткери, драматург П.Айтмуратов катнасты  ҳәм өзи окып билим  алған мектеп оқыўшыларына 30дан аслам ҳәр түрли мазмундағы жокары қунлыққа ийе , қарақалпақ, өзбек ҳәм жәҳән адебиятының бийбаҳа дурданаларынан болған китаплар топламларын саўға етти.

Кунхожа, Әжинияз, Бердақ Т.Кайыпбергенов, И.Юсупов, Абай, Мухаммад Юсуп, Сиражиддин  Сайд, балаларға арналған  әдебий китаплар мине усылар қатарынан орын алған.  Әдебий  кешеде мектеп окыўшылары      П. Айтмуратовқа  дөретиўшилигине байланыслы бир неше мазмундағы өзлери қызықтырған  сораўлар берди.  Мектеп директоры  Мақсет Сапаров бахалы китаплар ҳәм мазмунлы сәубет ушын П.Атмуратовқа мектеп жәмәәти атынан өз миннетдаршылығын  билдирди.


Өсип кийатырған жас аўлад ушын китаптан артық саўға болмаса керек. Себеби ҳар қандай тәрбияның тамыры ол оқыған китаплардан басланады.  Сондай екен перзентлеримизге ҳәр түрли мазмундағы қызықлы,тәрбиялық аҳмийетке ийе китапларды саўға етейик!    Дилафруз Муратбаева көркемөнертаныӯшы журналист